Bir təbəssüm hər şeyi anladır mənə! – Fátima Estelanın şeiri

Epiloq.az salvadorlu şairə Fatima Estela Benitez Dimasın “Bir təbəssüm hər şeyi anladır mənə” şeirini təqdim edir.

Fatima Estela Benitez Dimas 25 aprel 1991-ci ildə San Salvador şəhərində anadan olub. 15 yaşından sərbəst vəzndə şeirlər yazır. “Könül şeirləri” (“Poemas del alma”) ədəbiyyat bloqunun (https://www.poemas-del-alma.com/blog/comunidad) baş redaktorudur. Bundan əlavə Feysbuk sosial şəbəkəsində 20.000-dən çox izləyicisi olan “Ədəbiyyat və poeziya” (“Literatura y poesía”) (https://www.facebook.com/literaturaypoesiaa/) səhifəsinin redaktorudur.

Həyatımın elə bir nöqtəsindəyəm ki,

məni maraqlandıran yeganə şey –

həyatdan zövq almaqdır…

Arxonanın dediyitək –

günortadan sonra sevindirər səni

bir fincan qəhvə, bir siqaret də…

Mən bu cür xırda şeylərin dəlisiyəm…

Nəzərdən qaçanları sonacan dadmaqdan,

varlığın məğzinə varmaqdan

və özüm olmaqdan xoşum gəlir…

San Salvadordakı istənilən səkinin kənarında

həşəratlar və özüm kimi insanlar arasında otura bilərəm

və oturduğum yerin gözəlliyini duya bilərəm.

Seyr edirəm

Azadlıq meydanındakı qədim qapıları,

Rosario kilsəsindən görünən günəşin qürubunu,

Vitraj pəncərələrindən süzülən qırmızı şuaları…

Baş kilsəyə gəlib,

Barrios meydanında görüşənləri görürəm… 

Göyərçinlərin dəstə-dəstə gəzişdiyini,

satıcı qızların qəhvə arabalarını görürəm…

Vaxtlarını öldürən vərdişkar qocaların

sarayın pilləkənlərində oturub

şahmat oynamalarını görürəm.

Pomidor qutularından evcik düzəldən

qayğısız uşaqları görürəm…

Arzulanan həyat elə burdadır –

uşaqları çağıran anaların

və insanları qəhvə almağa səsləyən

satıcıların səsləri arasında,

yanlarından ötüb keçən

və onları görməyən insanlar arasında!

Bu balaca uşaq

öz kiçik dünyasında,

pomidor qutusundan düzəltdiyi xırda evcikdə

heyrət içində baxır hər şeyə.

Gözlərini üzümə zilləyib

gülüşlə cavab verir gülüşümə.

Və hər şeyi anladır mənə

bu balaca uşağın məsum təbəssümü!

İspan dilindən tərcümə edən: Aysel Əliyeva